भारत आंतरराष्ट्रीय ऑलिम्पिक समितीचे यजमानपद भूषवेल: नीता अंबानी

Spread the love

• २०२३मध्ये जिओ वर्ल्ड कन्व्हेन्शन सेंटर येथे बैठक होणार
• चार दशकांनंतर ऑलिम्पिक समितीचे अधिवेशन भारतात
कोल्हापूर • प्रतिनिधी
      आंतरराष्ट्रीय ऑलिम्पिक समितीची पुढील बैठक जिओ वर्ल्ड कन्व्हेन्शन सेंटर, मुंबई येथे होणार आहे. २०२३मध्ये होणाऱ्या या वार्षिक सभेच्या यजमानपदासाठी झालेल्या मतदानात भारताला ७६ मतांपैकी ७५ मते मिळाली. प्रचंड बहुमताने होस्टिंग अधिकार जिंकल्यानंतर, आयओसी सदस्य आणि रिलायन्स फाऊंडेशनच्या अध्यक्षा नीता अंबानी यांनी हा भारतासाठी अभिमानाचा क्षण असल्याचे म्हटले आहे.
      भारतीय शिष्टमंडळाचे नेतृत्व करताना नीता अंबानी यांनी आयओसीच्या आगामी बैठकीत भारतात होण्यासाठी जोरदार वकिली केली. त्यांनी आयओसी सदस्यांना सांगितले की, “भविष्यात युवा ऑलिम्पिक आणि ऑलिम्पिक खेळ भारतात आणण्याचे आमचे स्वप्न आहे. जगातील सर्वात तरुण देश असलेल्या भारतातील तरुणांनी ऑलिम्पिकची भव्यता अनुभवावी अशी आमची इच्छा आहे. आम्हाला ही भागीदारी आणखी मजबूत करायची आहे.”
       आयओसी वार्षिक बैठक भारतात आयोजित केल्याबद्दल आनंद व्यक्त करताना, नीता अंबानी म्हणाल्या, ” ४० वर्षांच्या प्रतिक्षेनंतर ऑलिम्पिक चळवळ भारतात परत येत आहे. २०२३ मध्ये मुंबईत आयओसी सत्र आयोजित करण्याचा मान भारताला दिल्याबद्दल मी ऑलिम्पिक समितीबद्दल कृतज्ञता व्यक्त करते. ही भारतीय खेळांसाठी एका नव्या युगाची सुरुवात ठरेल.” नीता अंबानी यांनी २०२३ च्या ऑलिम्पिक हंगामाच्या निमित्ताने वंचित समुदायातील तरुणांसाठी विशिष्ट क्रीडा विकास कार्यक्रमांची मालिका सुरू करण्याचा प्रस्तावदेखील मांडला.
       भारतीय शिष्टमंडळात नीता अंबानी, भारतीय ऑलिम्पिक संघटनेचे (IOA) अध्यक्ष डॉ. नरिंदर बत्रा, युवा व्यवहार आणि क्रीडा मंत्री अनुराग सिंग ठाकूर आणि नेमबाजीतील ऑलिम्पिक सुवर्णपदक विजेता अभिनव बिंद्रा यांचा समावेश होता. बीजिंगमध्ये सुरू असलेल्या आयओसीच्या वार्षिक अधिवेशनात, आगामी बैठकीचे यजमानपद देण्यासाठी भारतीय शिष्टमंडळ  व्हर्चुअली भारताच्या बाजूने सामील झाले.
       चार दशकांनंतर भारतात आंतरराष्ट्रीय ऑलिम्पिक समितीचे अधिवेशन होणार आहे. शेवटचा कार्यक्रम १९८३ मध्ये झाला होता. सत्रात, आयओसी सदस्य ऑलिम्पिक चार्टर आणि ऑलिम्पिकच्या यजमान शहराची निवडणूक यासारख्या महत्त्वाच्या विषयांवर चर्चा करण्यात येते.
      भारतीय ऑलिम्पिक असोसिएशनचे अध्यक्ष डॉ. नरिंदर बत्रा यांनी एका निवेदनात म्हटले आहे की, मी श्रीमती नीता अंबानी यांची दूरदृष्टी, नेतृत्व आणि त्यांना समर्थन दिल्याबद्दल माझ्या सर्व आयओसी सहकाऱ्यांचे आभार मानतो. पुढच्या वर्षी तुम्हाला मुंबईत भेटण्यास उत्सुक आहे. खेळांसाठी एक नवीन युग सुरू होत आहे.  आमच्या पुढच्या पिढीचे उज्ज्वल भविष्य घडवण्यासाठी ऑलिम्पिक चळवळीने मध्यवर्ती भूमिका बजावावी अशी आमची ईच्छा आहे. २०२३ मध्ये मुंबईत एक संस्मरणीय आयओसी सत्र आयोजित करणे, हा भारताच्या नवीन क्रीडा क्षमतेचे प्रदर्शन करण्याचा एक मार्ग आहे. त्यादृष्टीने हे पहिले पाऊल असेल.
——————————————————- Attachments area

Leave a Reply

Your email address will not be published.

error: Content is protected !!